சைவ சமயப் பேரவை அமைக்கும் முயற்சியை முன்னெடுத்து சைவ சமய ஆர்வலர் துணையுடன் வெற்றி கண்டவர் முனைவர் நாகப்பன் ஆறுமுகம். முனைவர் ஐயா சைவ சித்தாந்தத் துறையில் முறையாகப் பயிற்சி பெற்றவர். மலாயாப் பல்கலைக்கழகத்தில் இந்திய ஆய்வியல் துறையில் பக்தி இலக்கியம் உட்படப் பயின்று இளங்கலைப்பட்டம் பெற்றவர். மதுரைப் பல்கலைக் கழகத்தில் சைவ சித்தாந்தத்தைச் சிறப்புப் பாடமாய்க் கற்று முதுகலைப் பட்டம் பெற்றவர். திருநெல்வேலி மனோன்மணியம் சுந்தரனார் பல்கலைக்கழகத்தில் சைவ சித்தாந்தத் துறையில் ஆய்வு மேற்கொண்டு முனைவர் பட்டம் பெற்றவர்.

தமிழ்ப் பள்ளி, இடைநிலைப் பள்ளி ஆசிரியராகவும், ஆசிரியர் பயிற்சிக் கல்லூரி விரிவுரையாளராகவும் பணியாற்றி ஐம்பது வயதில் விருப்பு ஓய்வு பெற்று சைவ சமயத்தைக் கற்பதிலும் கற்பிப்பதிலும் ஈடுபட்டார். மலேசிய இந்து சங்கத்தில் துணைமை, தலைமை பொறுப்புகள் ஆற்றியவர். சமயப் பரப்புரை செய்வதிலும் சக்தி என்னும் சமய இதழ் நடத்துவதிலும் முனைப்புடன் ஈடுபட்டார்.மலேசிய சைவ சமயப் பேரவையை அமைத்துச் செயலாற்றி வரும் ஐயா, பேரவையின் ஆதரவு அமைப்பாக சைவத் திருக்கோயில் கலை, கல்வி அறவாரியத்தையும் (Yayasan Falsafah dan Institusi Saiva) அமைத்துள்ளார். சைவ சித்தாந்த மாணவர் பெருமக்களின் துணையுடன் ஏறத்தாழ 7.5 ஏக்கர் நிலம் வாங்கப்பெற்றுள்ளது. இம்மனையில் ஆலவாய் அண்ணலுக்கு அழகிய திருக்கோயில் ஒன்று அமைப்பதுடன் தமிழ், மற்றும் சைவ சமய மேம்பாட்டுக்கெனக் கல்விக் கழகம் ஒன்றும் அமைக்கப்படும்.